A Plataforma Ourense Mellor decide presentarse ás eleccións municipais

PLATAFORMA CIDADÁ POR UN OURENSE MELLOR

A Plataforma Ourense Mellor decide presentarse ás eleccións municipais

No día de onte tivo lugar no Campus de Ourense, unha asamblea aberta da Plataforma cidadá Ourense Mellor para dar conta das reunións e contactos mantidos para conseguir unha posible confluencia das forzas de esquerda na cidade e para decidir o futuro máis inmediato da Plataforma.

Á reunión asistiron arredor de 90 persoas, entre elas representantes e líderes de asociacións veciñais, xuvenís, deportivas e culturais, así como exconcelleiras e exconcelleiros, parlamentarios galegos, exsenadores, persoas vencelladas ao mundo do sindicalimo e integrantes doutras plataformas da cidade. Tamén asistiu un nutrido grupo de xente nova desencantada coa situación actual da cidade e que procura unha alternativa para poder xerar ilusión entre a mocidade.

Membros da plataforma deron conta das conversas mantidas coas organizacións de esquerda da cidade. Con respecto ao convite enviado ao BNG para analizar a situación actual do do municipio e establecer fórmulas de colaboración para facer fronte ás dereitas en Ourense, non houbo ningún tipo de resposta. En relación a Ourense en Común, lamentablemente a organización decidiu continuar co seu calendario partidario e aprobar a súa candidatura propia e programa para as municipais. Con respecto a EU e Podemos, as conversas mantivéronse nun clima de sintonía e cordialidade, e os contactos seguen abertos.

Ante esta situación e en vista da necesidade de ofrecer ás veciñas e veciños de Ourense unha alternativa seria e necesaria que hoxe non existe, as e os asistentes decidiron, co voto positivo de todas as persoas reunidas e unha abstención, concorrer como proposta nova e ilusionante, cunha candidatura que se decidirá nas vindeiras semanas que misture experiencia, solvencia, honestidade e traballo, ás vindeiras eleccións do 26 de maio de 2019.

Acordouse tamén continuar ata o último momento tentando a tan necesaria unidade da esquerda en Ourense, polo que volvemos facer un chamado aos partidos políticos para que pensen no ben da cidade e non nos seus intereses propios, lexítimos, pero partidistas.

Por outra banda, alédanos comunicar que outras organizacións políticas amosaron o seu apoio explítico e xa están a participar na Plataforma. Nas vindeiras semanas faranse públicos todos os apoios á Plataforma.
Todas as persoas que queiran participar ou estar informadas sobre o traballo que está a desenvover a Plataforma, poden asinar o manifesto: http://ourensemellor.gal/asinar-o-manifesto/ seguirnos a través das redes sociais ou enviar un mail a: info@ourensemellor.gal

 

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.